वैकल्पिक मार्गबाट काठमाडौँ भित्र्याएर ५ दिनमा २ लाख ३३ हजार सिलिण्डर ग्यास बिक्री

काठमाडौँ, भदौ २७ गते । पृथ्वी राजमार्गको कृष्णभिर खण्डमा पहिरो गएर यातायात अवरुद्ध भएपछि नेपाल आयल निगमले वैकल्पिक मार्ग प्रयोग गरी पछिल्लो पाँच दिनमा काठमाडौँ उपत्यकामा २ लाख ३३ हजार ६६२ सिलिण्डर एलपी ग्यास भित्र्याएर बिक्री गरेको छ। मुख्य राजमार्ग ठप्प भएपछि निगमको समन्वयमा तराईका विभिन्न जिल्लामा सिलिण्डर रिफिल गरी काठमाडौँ ल्याउने व्यवस्था मिलाइएको हो।

निगमका अनुसार भदौ १४ गतेदेखि काठमाडौँ, धादिङ र काभ्रेपलाञ्चोकस्थित ग्यास उद्योगका खाली सिलिण्डरहरू तराईका बारा, पर्सा, मकवानपुर, चितवन, नवलपरासी, धनुषा र महोत्तरीका उद्योगमा पठाएर भर्ने काम गरिएको थियो। यसरी रिफिल गरिएका सिलिण्डरहरू वैकल्पिक बाटो हुँदै काठमाडौँ उपत्यकामा ल्याएर उपभोक्तालाई वितरण गरिएको छ।

उपत्यकामा ग्यासको अभाव हुन नदिन सोमबार ४८ हजार १०९, मङ्गलबार ४६ हजार २१८, बुधबार ५३ हजार ४६९, बिहीबार ४५ हजार २३० र शुक्रबार ४० हजार ६३६ थान सिलिण्डर बिक्री गरिएको निगमले जनाएको छ। पृथ्वी राजमार्ग पूर्ण रूपमा नियमित सञ्चालन नहुँदासम्म वैकल्पिक मार्गबाटै ग्यास आपूर्तिको यो व्यवस्था निरन्तर जारी रहनेछ।

मुख्य विवरण तथा दैनिक ग्यास बिक्री तथ्याङ्क