निजामतीमा राजीनामाको लहर: चार महिनामा ४८७ कर्मचारीले दिए राजीनामा

काठमाडौँ, भदौ २७ गते । निजामती सेवामा अनिवार्य अवकाशको मुखमा पुगेका कर्मचारीहरूले सेवा अवधि बाँकी हुँदै पदबाट राजीनामा दिने क्रम ह्वात्तै बढेको छ।

राष्ट्रिय किताबखानाका अनुसार गत वैशाखदेखि साउन मसान्तसम्मको चार महिनाको अवधिमा मात्रै नेपाल सरकारका सचिवदेखि कार्यालय सहयोगी तहसम्मका ४८७ जना निजामती कर्मचारीले राजीनामा दिएका छन्। विगतका वर्षहरूमा सोही अवधिमा १५० देखि २०० जनाले मात्र राजीनामा दिने गरेका थिए।

कर्मचारीहरूले राजीनामा पत्रमा घरायसी र स्वास्थ्य समस्या उल्लेख गरे पनि प्रस्तावित ‘सङ्घीय निजामती सेवा विधेयक’ मा ३० वर्षे पेन्सन गणनाको प्रस्ताव आएको चर्चाका कारण उनीहरूले राजीनामा दिएको आकलन गरिएको छ। १५ दिनदेखि दुई वर्षसम्म सेवा अवधि बाँकी रहेका कर्मचारीहरूले राजीनामा दिइरहेका छन्।

सङ्घीय मामिला तथा सामान्य प्रशासन मन्त्रालयका अनुसार यो राजीनामा स्वेच्छिक र अवकाशको नजिक पुगेका कर्मचारीहरूको भएकाले सरकार आत्तिनुपर्ने अवस्था छैन। मन्त्रालयको सङ्ख्या २१ बाट १८ मा झारिएको र दरबन्दी कटौती भएको अवस्थामा छोटो अवधि बाँकी रहेका कर्मचारीले राजीनामा दिँदा फाजिलमा बस्नुनपर्ने र नयाँ प्रविधिमैत्री पुस्ताका लागि ठाउँ खाली हुने मन्त्रालयको भनाइ छ।

तथ्याङ्क तथा मुख्य विवरण