माउन्ट फुजीमा ७ वर्षीय छोरालाई घण्टौँ एक्लै छाड्ने बुबालाई प्रहरीको कडा चेतावनी

टोकियो, भदौ ६ गते । जापानको चर्चित माउन्ट फुजी आरोहणका क्रममा एक व्यक्तिले आफ्ना सात वर्षीय छोरालाई घण्टौँसम्म एक्लै छाडेपछि प्रहरीले अभिभावकीय लापरवाहीबारे गम्भीर चेतावनी दिएको छ। उकालो चढ्दा बालक थाकेपछि बुबाले उनलाई समुद्री सतहबाट दुई हजार मिटरभन्दा बढी उचाइमा रहेको छैटौँ स्टेशनमा छाडेर जेठो छोरासँगै आरोहण जारी राखेका थिए।

बालकलाई करिब आठ घण्टासम्म खाजा र पेय पदार्थका साथ त्यहीँ पर्खन भनिएको थियो, तर उनीसँग पैसा भने थिएन। पहाडी विश्रामस्थलका कर्मचारीले बालकलाई लामो समयसम्म एक्लै देखेपछि प्रहरीलाई खबर गरेका थिए। प्रहरीले पछि आठौँ स्टेशनमा पुगेका बुबालाई सम्पर्क गरी बालकलाई जिम्मा लगाएको छ।

प्रहरीसमक्ष बुबाले आफ्नो गल्ती स्वीकार गर्दै माफी मागेका छन्। अत्यधिक उचाइ र जोखिमपूर्ण वातावरणमा बालकलाई यसरी एक्लै छाड्नु खतरनाक हुने भन्दै प्रहरीले आगामी दिनमा यस्तो लापरवाही नगर्न अभिभावकहरूलाई सतर्क गराएको छ।