आज देशभर वर्षाको सम्भावना, सुदूरपश्चिममा धेरै भारी वर्षाको चेतावनी

काठमाडौं, साउन ३१ गते । हाल देशभर मनसुनी वायुको प्रभाव रहेकाले आज देशका अधिकांश भूभागमा वर्षाको सम्भावना रहेको छ। जल तथा मौसम विज्ञान विभागका अनुसार आगामी २४ घण्टामा देशभर सामान्यतया बदली रही विभिन्न प्रदेशमा मेघगर्जन तथा चट्याङसहित मध्यम वर्षा हुने सम्भावना छ।

आज दिउँसो हिमाली भू-भागका केही स्थानमा मेघगर्जन/चट्याङसहित मध्यम वर्षा तथा हिमपातको सम्भावना रहेको छ। गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागका धेरै स्थान तथा कोशी र बागमती प्रदेशका पहाडी भू-भागका केही स्थानमा मेघगर्जन/चट्याङसहित मध्यम वर्षा हुन सक्ने विभागले जनाएको छ।

त्यस्तै लुम्बिनी र सुदूरपश्चिम प्रदेशका तराई भू-भागका धेरै स्थान, बागमती र गण्डकी प्रदेशका तराई भू-भागका केही स्थान तथा मधेश र कोशी प्रदेशका तराई भू-भागका थोरै स्थानमा पनि मेघगर्जन/चट्याङसहित मध्यम वर्षाको सम्भावना छ।

गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भाग तथा लुम्बिनी र सुदूरपश्चिमका तराई भू-भागका एक–दुई स्थानमा भारी वर्षा हुन सक्ने पूर्वानुमान छ। सुदूरपश्चिम प्रदेशको पहाडी तथा तराई भू-भागका एक–दुई स्थानमा धेरै भारी वर्षा हुने सम्भावना रहेको छ।

राति पनि वर्षाको सम्भावना

आज राति पनि देशभर सामान्यतया बदली रहनेछ। गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका धेरै स्थान तथा कोशी र बागमती प्रदेशका हिमाली तथा पहाडी भू-भागका केही स्थानमा मेघगर्जन/चट्याङसहित मध्यम वर्षा हुने सम्भावना छ।

गण्डकी, लुम्बिनी र सुदूरपश्चिमका तराई भू-भागका धेरै स्थान तथा मधेश, कोशी र बागमती प्रदेशका तराई भू-भागका थोरै स्थानमा पनि वर्षा हुन सक्ने विभागले जनाएको छ।

रातिको समयमा गण्डकी, लुम्बिनी, कर्णाली र सुदूरपश्चिमका पहाडी भू-भाग तथा लुम्बिनी र सुदूरपश्चिमका तराई भू-भागका एक–दुई स्थानमा भारी वर्षा हुन सक्नेछ। लुम्बिनी प्रदेशको तराई भू-भागका एक–दुई स्थानमा धेरै भारी वर्षा हुने सम्भावना रहेको छ।

मनसुनी वायुको प्रभाव

मौसमविद्का अनुसार हाल देशभर मनसुनी वायुको प्रभाव रहेको छ। मनसुनको न्यून चापीय रेखा पूर्वतर्फ सरदर स्थानको आसपास तथा पश्चिमतर्फ सरदर स्थानभन्दा उत्तरतर्फ नेपालको नजिक रहेको छ।

भारी तथा धेरै भारी वर्षाको सम्भावना भएका क्षेत्रमा बाढी, पहिरो, डुबान तथा सडक अवरुद्ध हुने जोखिम रहन सक्ने भएकाले सर्वसाधारणलाई आवश्यक सतर्कता अपनाउन र यात्रा गर्दा मौसम तथा सडकको अवस्था बुझेर मात्र अघि बढ्न आग्रह गरिएको छ।