१५ औं विश्व शारीरिक सुगठन तथा फिजिक च्याम्पियनसिपमा सनम मूलगुठीलाई रजत पदक

२५ कात्तिक, काठमाडौं । नेपाली बडीबिल्डर सनम मूलगुठीले शनिबार माल्दिभ्समा भइरहेको १५ औं विश्व शारीरिक सुगठन तथा फिजिक च्याम्पियनसिपमा शनिबार रजत पदक जितेकी छन् । उनले वुमन्स वान पिस स्वीमसुट १६५ सेन्टिमिटर विधामा दोस्रो स्थान प्राप्त गर्दै रजत जितेकी हुन् । यस विधामा १९ जनाले प्रतिस्पर्धा गरेका थिए ।

सनमले गत वर्ष काठमाडौंमै भएको ५५ औं एसियन बडीबिल्डिङ तथा स्पोर्ट्स फिजिक च्याम्पियनसिपमा स्वर्ण पदक जितेकी थिइन् । उनी एसियन लेभलमा स्वर्ण जित्ने पहिलो नेपाली खेलाडी हुन् । माल्दिभ्सको अदु सिटीमा भइरहेको विश्व शारीरिक सुगठनमा शुक्रबार पनि नेपालले तीन रजत जितेको थियो । नेपालका लागि रुजेश शाही, प्रज्वलमान शाक्य र रजनी श्रेष्ठले रजत पदक जितेका थिए ।