अध्ययन बिदापछि नफर्किएका शिक्षक-कर्मचारीलाई त्रिविको कडा निर्देशन: पुस मसान्तभित्र सम्पर्क नगरे कानुनी कारबाही हुने

काठमाडौँ, असोज १९ गते । त्रिभुवन विश्वविद्यालय (त्रिवि) ले अध्ययन बिदा उपभोग गरेपछि नियम अनुसार सेवामा नफर्किएका वा तोकिएको अवधि पूरा नगरेका शिक्षक तथा कर्मचारीहरूलाई २०८३ साल पुस मसान्तभित्र रजिस्ट्रारको कार्यालयमा सम्पर्क गर्न निर्देशन दिएको छ।

विश्वविद्यालयद्वारा आइतबार जारी सार्वजनिक सूचनामा तोकिएको अवधिभित्र सम्पर्कमा नआएमा कबुलियतनामा र प्रचलित नियम अनुसार कडा कानुनी कारबाही अगाडि बढाइने चेतावनी दिइएको छ।

त्रिविले अध्ययन बिदाको अवधि सकिएपछि पनि सेवामा नफर्किएका तथा फर्किएर पनि तोकिएको न्यूनतम अवधि पूरा नगर्ने शिक्षक तथा कर्मचारीबाट प्राप्त तलब, भत्ता तथा अन्य सुविधाहरू नियमानुसार हर्जानासमेत जोडेर रकम असुलउपर गर्ने प्रक्रियालाई तीव्रता दिएको छ।

त्रिवि रजिस्ट्रारको कार्यालय अन्तर्गत कर्मचारी प्रशासन महाशाखाका अनुसार हालसम्म यस्ता ७५ जना शिक्षक तथा कर्मचारीहरूबाट करिब १६ करोड ५० लाख रुपियाँ असुलउपर भइसकेको छ। सम्पर्कमा आएका व्यक्तिहरूको व्यक्तिगत अभिलेख खोजी तथा अध्ययन गरी बुझाउनुपर्ने रकम असुल गर्ने काम निरन्तर जारी रहेको विश्वविद्यालयले जनाएको छ।

विश्वविद्यालयले अध्ययन बिदामा गएर फर्कन बाँकी रहेका अन्य शिक्षक तथा कर्मचारीहरूको थप अभिलेख खोजी गर्ने कामसमेत भइरहेको जनाएको छ। त्रिविको यो कदमले अध्ययन बिदाको नाममा राज्यको स्रोत र सुविधा उपभोग गरेर गैरजिम्मेवार बन्ने प्रवृत्तिलाई नियन्त्रण गर्ने अपेक्षा गरिएको छ।