‘हिट किक बक्सिङ– ५९’ मा अविरल घिमिरेको ऐतिहासिक जित, फ्रान्सेली बक्सर नकआउट

काठमाडौँ, भदौ २१ गते । नेपाली युवा बक्सर अविरल घिमिरे ‘हिमालयन चितुवा’ ले किक बक्सिङको इतिहासमा पुनः एकपटक स्वर्ण अक्षरले आफ्नो नाम लेख्न सफल हुनुभएको छ ।

जापानको नागोयास्थित करिया हलमा सम्पन्न ‘हिट किक बक्सिङ– ५९’ को अन्तरराष्ट्रिय किक बक्सिङ महासङ्घ, विश्व च्याम्पियनसिप मेन इभेन्टमा उहाँले सन् २०२५ का विश्व च्याम्पियन फ्रान्सका बक्सर माथन चोइनार्डलाई नकआउट गर्दै शानदार जित हासिल गर्नुभएको हो ।

खेलको दोस्रो राउण्डको दोस्रो मिनेटमै घिमिरेले प्रहार गरेको कडा मुक्काका अगाडि फ्रान्सका प्रतिस्पर्धी टिक्न सकेनन् र नकआउट हुन पुगे । हालसम्म २९ वटा अन्तर्राष्ट्रिय प्रतियोगितामा प्रतिस्पर्धा गरिसक्नुभएका अविरलको यो २१ औँ जित हो । विशेष कुरा त के छ भने, उहाँले हासिल गरेका २१ जितमध्ये २० वटा खेल नकआउटमै जितेर आफ्नो अद्वितीय क्षमता र कीर्तिमान कायम गर्नुभएको छ ।

अन्तर्राष्ट्रिय खेलमञ्चमा नेपालको पहिचान, गौरव र शानलाई उँचो बनाउन सफल घिमिरेले आफ्नो जितपछि सामाजिक उत्तरदायित्व पनि प्रदर्शन गर्नुभयो । विजय प्राप्तपश्चात् उहाँले हालै रसुवाको भोटेकोशीमा आएको बाढीका कारण पुगेको अपूरणीय क्षतिप्रति गहिरो दुःख व्यक्त गर्दै पीडितहरूलाई सहयोग गर्ने घोषणा गर्नुभएको छ ।