11/18/2026, 16:16:47
बुधबार, मङि्सर ०३, २०८३

प्रधानमन्त्रीसँग सांसदहरूको प्रश्नोत्तर : ११ सांसदले दर्ता गराए प्रश्न

FILE PHOTO - SETOPRESS.COM
©FILE PHOTO - SETOPRESS.COM

काठमाडौँ, भदौ ९ गते । नेपालको प्रतिनिधि सभामा प्रधानमन्त्री वालेन्द्र शाहसँग भदौ १० गतेका लागि तय गरिएको प्रश्नोत्तर कार्यक्रमका लागि ११ जना सांसदहरूले आफ्ना प्रश्न दर्ता गराएका छन्।

नियमानुसार १५ वटासम्म प्रश्न दर्ता गराउन सकिने कोटा रहे तापनि सत्तारूढ दल राष्ट्रिय स्वतन्त्र पार्टी (रास्वपा) का सांसदहरूले आफूलाई प्राप्त कोटा पूर्ण रूपमा प्रयोग गरेनन्। रास्वपाका लागि सात वटा प्रश्नको कोटा छुट्याइएकोमा तीन जना सांसदले मात्र प्रश्न दर्ता गराएका छन् भने अन्य राजनीतिक दलहरूले आफ्नो भागमा परेको कोटा अनुसार प्रश्न दर्ता गराएका छन्।

सभामुख डोलप्रसाद अर्यालले प्रतिनिधि सभाको नियमावली अनुसार भदौ ५ गतेभित्र प्रश्न दर्ता गरिसक्न निर्देशन दिनुभएको थियो।

प्रधानमन्त्रीसँगको प्रश्नोत्तर कार्यक्रमका लागि प्रश्न दर्ता गराएका सांसदहरू र उनीहरूको राजनीतिक दलको विवरण तालिकामा निम्न बमोजिम छ:

क्र.सं. सांसदको नाम राजनीतिक दल
१ अमरेशकुमार सिंह राष्ट्रिय स्वतन्त्र पार्टी (रास्वपा)
२ कृष्णहरि बुढाथोकी राष्ट्रिय स्वतन्त्र पार्टी (रास्वपा)
३ समीक्षा बाँस्कोटा राष्ट्रिय स्वतन्त्र पार्टी (रास्वपा)
४ बासना थापा नेपाली कांग्रेस
५ गीता गुरुङ नेपाली कांग्रेस
६ ऐनबहादुर महर नेकपा (एमाले)
७ गणेशसिंह ठगुन्ना नेकपा (एमाले)
८ वर्षमान पुन नेपाली कम्युनिस्ट पार्टी (नेकपा)
९ प्रमेश हमाल नेपाली कम्युनिस्ट पार्टी (नेकपा)
१० हर्कराज राई श्रम संस्कृति पार्टी
११ खुश्बु ओली राष्ट्रिय प्रजातन्त्र पार्टी (राप्रपा)

संसद् सचिवालयका अनुसार सबै राजनीतिक दलको प्रतिनिधित्व सुनिश्चित हुने गरी ६ वटा दलका लागि १-१ प्रश्न र बाँकी ९ वटा प्रश्न सांसद सङ्ख्याका आधारमा हेरफेर गरी भाग लगाइएको थियो। दर्ता भएका यी सबै ११ वटा प्रश्नको उत्तर भदौ १० गते बस्ने प्रतिनिधि सभाको प्रत्यक्ष बैठकमा प्रधानमन्त्री शाहले दिनुहुने छ। यसअघि २०७५ माघ ४ गते पहिलो पटक आयोजना गरिएको प्रश्नोत्तर कार्यक्रममा दर्ता भएका १८ वटै प्रश्नको उत्तर तत्कालीन प्रधानमन्त्री केपी शर्मा ओलीले दिनुभएको अभ्यास रहेको थियो।