समृद्ध बागमती निर्माणका लागि तीनै तहबीच समन्वय र सहकार्य आवश्यक: मुख्यमन्त्री किरण थापा मगर

काठमाडौँ, असोज १९ गते । बागमती प्रदेशका मुख्यमन्त्री किरण थापा मगरले सङ्घीयता कार्यान्वयनमा देखिएका कमजोरीहरूलाई सुधार गर्दै समृद्ध प्रदेश निर्माणका लागि सङ्घ, प्रदेश र स्थानीय सरकारबिच समन्वय, सहकार्य र सहअस्तित्व अपरिहार्य रहेको बताउनुभएको छ।

बागमती प्रदेश सुशासन केन्द्रले ललितपुरमा आयोजना गरेको ‘सङ्घीयता कार्यान्वयनका १० वर्ष’ विषयक अन्तरसंवाद कार्यक्रमलाई सम्बोधन गर्दै मुख्यमन्त्री थापामगरले स्थानीय तहसँग समन्वय नगरी योजना पठाउँदा कार्यान्वयनमा समस्या देखिएकाले तीनै तहका जनप्रतिनिधि मिलेर अघि बढ्नुपर्नेमा जोड दिनुभयो।

मुख्यमन्त्री थापा मगरले बागमती प्रदेश सरकारले शिक्षा र स्वास्थ्य क्षेत्रलाई प्राथमिकतामा राखेर बजेट विनियोजन गरिरहेको जानकारी दिनुभयो। प्रदेश सरकारले बागमती विश्वविद्यालय सञ्चालन गर्नुका साथै मदन भण्डारी स्वास्थ्य विज्ञान प्रतिष्ठानमार्फत स्वास्थ्य सेवा तथा जनशक्ति विकासमा महत्त्वपूर्ण काम गरिरहेको उहाँको भनाइ थियो। उहाँले निर्मित कानुनहरूको प्रभावकारी कार्यान्वयन गर्दै नागरिकले प्रत्यक्ष लाभ पाउने वातावरण बनाउनुपर्ने धारणा राख्नुभयो।

कार्यक्रममा बागमती प्रदेशकी उपसभामुख अप्सरा चापागाईंले सीमित स्रोतसाधनका बाबजुद बागमती प्रदेशले कानुन निर्माण र सङ्घीयता सबलीकरणमा सातै प्रदेशको अगुवाका रूपमा भूमिका खेलिरहेको बताउनुभयो।

यस्तै, काठमाडौँ महानगरपालिकाकी कार्यवाहक प्रमुख सुनिता डङ्गोलले संविधानमा उल्लिखित अधिकारहरूको पूर्ण कार्यान्वयन र राज्यशक्तिको न्यायोचित बाँडफाँड नभएसम्म सङ्घीयता सबल हुन नसक्ने स्पष्ट पार्नुभयो।

अन्तरसंवादमा पूर्वसदस्य डा. खिमलाल देवकोटाले सङ्घीयताले सिंहदरबारको अधिकार नागरिकको घरदैलोसम्म पुर्‍याएको र विकासको जग बसालेको बताउनुभयो। चन्द्रागिरि नगरपालिकाका प्रमुख घनश्याम गिरीले पहुँचका आधारमा नभई आवश्यकताका आधारमा विकास योजना लैजानुपर्नेमा जोड दिनुभयो भने विदुर नगरपालिकाकी उपप्रमुख प्रभा बोगटी र प्रदेश सचिव उमेशकुमार ढकालले संस्थागत विकास, विपद् व्यवस्थापन र सेवा प्रवाहमा हासिल भएका उपलब्धिबारे चर्चा गर्नुभएको थियो।