प्रधानमन्त्री शाह संयुक्त राष्ट्रसङ्घको ८१ औँ महासभामा सहभागी हुन अमेरिका जाने

काठमाडौँ, भदौ २० गते । प्रधानमन्त्री बालेन्द्र शाह संयुक्त राष्ट्रसङ्घको ८१ औँ महासभामा सहभागी हुन नेपाली प्रतिनिधिमण्डलको नेतृत्व गर्दै अमेरिकाको न्युयोर्क जानुहुने भएको छ।

प्रधानमन्त्री भएपछिको उहाँको यो पहिलो उच्चस्तरीय विदेश भ्रमण हुनेछ, जहाँ उहाँले राष्ट्रसङ्घको मुख्यालयमा हुने महासभालाई सम्बोधन गर्नुहुनेछ।

नेपालमा हालै भदौ १० गते लाङटाङ लिरुङ हिमालको ढिक्का खसेर भोटेकोशी हुँदै आएको विनाशकारी हिमबाढीले ठुलो जनधनको क्षति पुर्‍याएको छ। यस कठिन परिस्थितिमा जलवायु परिवर्तनले नेपालमा पारेको उच्च प्रभाव र जलवायु न्यायको विषयलाई तथ्यसहित विश्वमञ्चमा उजागर गर्ने प्रारम्भिक तयारी गरिएको छ।

भ्रमणलाई फलदायी बनाउन प्रधानमन्त्री कार्यालय, परराष्ट्र, अर्थ, कृषि तथा वातावरण मन्त्रालयसहितका निकायहरूले विज्ञ तथा वैज्ञानिकहरूसँग छलफल गरिरहेका छन्। सरकारले हालसम्मको मानवीय तथा भौतिक क्षतिको विश्लेषण गर्दै विस्तृत प्रतिवेदन र सम्बोधनको खाका तयार पारिरहेको छ।

आगामी सेप्टेम्बर ८ देखि २८ सम्म चल्ने यस महासभामा प्रधानमन्त्री शाहसँगै परराष्ट्रमन्त्री शिशिर खनाल पनि सहभागी हुनुहुनेछ। महासभाको उद्घाटनसत्रको अध्यक्षता बङ्गलादेशका विदेशमन्त्री खलिलुर रहमानले गर्नुहुनेछ भने मुख्य साधारण बहस सेप्टेम्बर २२ देखि २६ सम्म सञ्चालन हुनेछ।