लगातारको वर्षाले विभिन्न राजमार्ग अवरुद्ध: यात्रा गर्नुअघि सडकको अवस्था बुझ्न प्रहरीको आग्रह

काठमाडौँ, भदौ १९ गते । लगातारको वर्षाका कारण पहिरो तथा बाढी आउँदा देशभरका मुख्य राजमार्ग र सडक खण्डहरू प्रभावित भएका छन्।

नेपाल प्रहरीका अनुसार काठमाडौँ उपत्यकासहित बागमती, कर्णाली र लुम्बिनी प्रदेशका विभिन्न प्रमुख मार्गहरूमा अवरोध सिर्जना भएको छ।

काठमाडौँको चिसापानी र धादिङको पृथ्वी लोकमार्गका विभिन्न स्थानमा पहिरो हटाएर एकतर्फी तथा साना सवारी सञ्चालन गरिए पनि काभ्रेको बीपी राजमार्ग, नुवाकोटको टोखा–छहरे, रसुवाको मुख्य राजमार्ग, मुगुको मुगु–गमगढी, रोल्पाको शहीदमार्ग र अर्घाखाँचीको सालझण्डी–ढोरपाटन सडक पूर्ण रूपमा अवरुद्ध रहेका छन्।

प्रहरीले बाढी-पहिरोका कारण सडकको अवस्था निरन्तर परिवर्तन भइरहेकाले सबै यात्रु तथा चालकहरूलाई यात्रा सुरु गर्नुअघि अनिवार्य रूपमा सडकको पछिल्लो वस्तुस्थिति बुझेर मात्र यात्रा गर्न अनुरोध गरेको छ।