भक्तपुरमा ‘ग्रान्ड ब्यूटी एण्ड बिजनेस’ एक्स्पो हुने

भक्तपुर, वैशाख १५ गते । भक्तपुरमा आगामी जेठ १३ र १४ गते हाटबजारसहित ‘ग्रान्ड ब्यूटी एण्ड बिजनेस एक्स्पो हुँदैछ । गठ्ठाघरस्थित जर्मन होम्स हस्पिटालिटीमा हुने एक्स्पो अन्तर्राष्ट्रिय स्तरको रहने आयोजक युथ इको नेपालले पत्रकार सम्मेलनमार्फत जनाएको छ ।

आयोजक संस्थाका अध्यक्ष आकाश गजुरेलले एक्स्पोको प्रमुख आकर्षणका रूपमा भारतका चर्चित हेयर आर्टिस्ट जावेद हबिबको विशेष उपस्थिति र प्रशिक्षण रहने बताउनुभयो । त्यस्तै, म्याक अब्राहेम, रोहित तिवारी तथा नेपालका लोकप्रिय कलाकार चिरागको समेत सहभागिता रहने अध्यक्ष गजुरेलले जानकारी गराउनुभयो ।

सो अवसरमा सय वटा स्टल राखी हाटबजार बनाइने र व्यवसाय प्रवर्धन गरिने जर्मन होम्स हस्पिटालिटीका प्रमुख कार्यकारी अधिकृत राजन कार्कीले बताउनुभयो । सौन्दर्य कला, साजसज्जा तथा भक्तपुरको मौलिक पहिचानको विकास र प्रवर्धनमा कार्यक्रम हाटबजार केन्द्रीत रहने उहाँको भनाइ छ ।

संस्थाका संरक्षक नरेश रन्जितले अन्तर्राष्ट्रिय ख्यातिप्राप्त सौन्दर्यकर्मीहरुको प्रशिक्षण र प्रयोगात्मक कक्षाले सहभागीहरुमा ज्ञान र सीपको अभिवृद्धि हुने तथा आत्मविश्वास बढ्ने विश्वास व्यक्त गर्नुभयो ।

नेपालको सौन्दर्य तथा साजसज्जा क्षेत्रमा कार्यरत पेशाकर्मी, व्यवसायी, कलाकार र यसप्रति रुची राख्नेहरुलाई लक्षित गरी एक्स्पो आयोजना गरिएको र यसमा दुई हजार जनाले प्रत्यक्षरुपले दुईदिने कार्यशालामा सहभागिता जनाउने आयोजकको भनाइ छ । प्रदर्शनी करिब १० हजार जनाले अवलोकन गर्ने आयोजकको अपेक्षा छ । खल्ती एपमार्फत सहभागिता अग्रिम सुनिश्चित गर्नसकिने आयोजकले जानकारी दिएको छ ।

आयोजक युथ इको नेपालले गत साउनमा सबैभन्दा बढी सहभागीसहित सौन्दर्य कार्यशाला सम्पन्न गरी एसियन रेकर्ड पनि बनाइसकेको छ। यो बिभिन्न क्षेत्रमा आवद्ध युवाहरु सम्मिलित गैरनाफामुखी संस्था हो ।