रास्वपाद्वारा उम्मेदवार छनोट समिति गठन र नयाँ विभाग प्रमुखहरूको मनोनयन: ‘हामी आउँदै छौँ’ अभियान सञ्चालन गर्ने निर्णय

काठमाडौँ, असोज १८ गते । राष्ट्रिय स्वतन्त्र पार्टी (रास्वपा) को केन्द्रीय समिति बैठकले आगामी स्थानीय निर्वाचनका लागि महामन्त्री विपिन आचार्यको संयोजकत्वमा ‘केन्द्रीय उम्मेदवार छनोट समिति’ गठन गरेको छ। पार्टी सभापति रवि लामिछानेको अध्यक्षतामा बनस्थलीस्थित केन्द्रीय कार्यालयमा बसेको बैठकले उक्त निर्णय गरेको हो।

प्रवक्ता जगदीश खरेलका अनुसार उम्मेदवार छनोट समितिमा मिलन लिम्बू, रहबर अन्सारी, तोसिमा कार्की, कविन्द्र बुर्लाकोटी, सुशान्त बैदिक, टासी ल्हाजोम र जनकसिंह धामी सदस्य रहेका छन्। समितिमा सातै प्रदेशका प्रदेश सभापतिहरू पदेन सदस्य रहनेछन्। बैठकले प्रवास, कानुन, सुशासन, पर्यटन लगायतका विभिन्न १५ भन्दा बढी केन्द्रीय विभागका प्रमुख तथा उपप्रमुखहरूको मनोनयनसमेत गरेको छ।

रास्वपाले यही असोज २० देखि २७ गतेसम्म ७७ वटै जिल्लाका ७५३ वटा पालिकामा पुगेर जनता तथा सरोकारवालाहरूसँग सुझाव सङ्कलन गर्न ‘हामी आउँदै छौँ’ अभियान सञ्चालन गर्ने निर्णय गरेको छ। यस अभियानका लागि पार्टीले सबै केन्द्रीय सदस्य तथा सांसदहरूलाई अनिवार्य रूपमा खटिन निर्देशन दिएको छ।

बैठकमा मधेस प्रदेशको साङ्गठनिक समस्या समाधानका लागि सहमहामन्त्री हरि ढकालको संयोजकत्वमा गठित कार्यदलले तयार पारेको प्रतिवेदन प्रस्तुत गरिएको छ। साथै, पार्टीको केन्द्रीय कार्यालय स्थानान्तरण गर्न काठमाडौँ उपत्यकामा जग्गा तथा घर खोजी गर्न आफ्ना सदस्य र शुभेच्छुकहरूलाई आग्रह गर्ने निर्णयसमेत बैठकले गरेको छ।

रास्वपा केन्द्रीय समितिका मुख्य निर्णयहरू