स्थानिय चुनाव लक्षित गर्दै रास्वपाले असोज २० देखि सुरु गर्दैछ ‘जनसंवाद’ अभियान: ७५३ वटै पालिका पुग्ने

काठमाडौँ, असोज १५ गते । सत्तारूढ राष्ट्रिय स्वतन्त्र पार्टी (रास्वपा) ले आगामी स्थानीय तहको निर्वाचनलाई लक्षित गर्दै देशभरका पालिकास्तरमा विशेष अभियान सञ्चालन गर्ने भएको छ।

आगामी असोज २० गतेदेखि सुरु हुने उक्त अभियान ‘नागरिकका कुरा सुन्न र आफ्ना कुरा भन्न’ भन्ने मूल नाराका साथ सञ्चालन गर्न लागिएको रास्वपाकी सहमहामन्त्री निशा डाँगीले जानकारी दिनुभयो।

नागरिकसँग प्रत्यक्ष जनसंवाद स्थापित गर्ने र जवाफदेहिता प्रवर्धन गर्ने उद्देश्यका साथ सबै स्थानीय तहमा यो अभियान चलाउन लागिएको हो। अभियानका क्रममा स्थानीय नागरिकका समस्या सुन्नुका साथै सरकारमा रहेका रास्वपाका मन्त्री र सांसदहरूले पछिल्लो छ महिनाको अवधिमा गरेका कामको प्रगति विवरण जनतासमक्ष प्रस्तुत गरिनेछ।

अभियानअन्तर्गत पार्टीका केन्द्रीय सदस्यहरू र सांसदहरू स्वयं ७७ वटै जिल्लाका ७५३ वटै पालिकामा प्रत्यक्ष पुग्नेछन्। उनीहरूले सरकारका कामकारबाहीबारे जानकारी दिनुका साथै आगामी स्थानीय तहको निर्वाचनमा उम्मेदवार छनोट प्रक्रियाका विषयमा समेत नागरिकहरूलाई स्पष्ट पार्नेछन्।

रास्वपाकी सहमहामन्त्री डाँगीका अनुसार कुन नेता वा सांसद कुन पालिकाको जिम्मेवारीमा खटिने भन्ने विषयको अन्तिम सूची चाँडै नै पार्टीको आधिकारिक माध्यमबाट सार्वजनिक गरिनेछ।