पृथ्वी राजमार्गको विकल्पमा त्रिशूलीपारि नयाँ सडक निर्माणको अध्ययन सुरु: गल्छीदेखि मुग्लिन हुँदै गैँडाकोट जोड्ने योजना

काठमाडौँ, असोज १९ गते । सरकारले पृथ्वी राजमार्गको तीव्र सवारी चाप कम गर्न र बाढी-पहिरोका कारण बारम्बार हुने सडक अवरोधको दीर्घकालीन समाधानका लागि त्रिशूली नदीपारि वैकल्पिक मार्ग निर्माण गर्ने योजना अगाडि बढाएको छ।

पछिल्लो समय बाढी र पहिरोले कृष्णभिर, परेवाभिर तथा जोगीमारा खण्ड क्षतविक्षत भई यातायात ठप्प बनेपछि यो वैकल्पिक मार्गको चर्चा र आवश्यकता पुनः चुलिएको हो।

राष्ट्रिय योजना आयोगका सदस्य एवम् पूर्वाधार विज्ञ इन्जिनियर अर्जुनजङ्ग थापाका अनुसार यो वैकल्पिक मार्गको प्राविधिक तथा भौगोलिक अध्ययनका लागि ‘नेपाल जियोटेक्निकल सोसाइटी‘ लाई जिम्मेवारी दिइएको छ। सोसाइटीले तीन महिनाभित्र प्रतिवेदन बुझाएपछि सोही आधारमा निर्माण प्रक्रिया अगाडि बढाइनेछ। नयाँ मार्ग धार्केबाट सुरु भई गल्छी, परेवाटार, आरुवासटार, बेनीदोभान, घ्याल्चोक र मुग्लिन पार गर्दै नवलपुरको गैँडाकोटसम्म जोड्ने खाका बनाइएको छ।

उक्त ६० किलोमिटर लामो वैकल्पिक सडकमध्ये करिब ५० किलोमिटर क्षेत्रमा स्थानीय तथा प्रदेश सरकारले पहिले नै ट्र्याक खोलिसकेकाले जग्गा प्राप्तिको झन्झट र मुआब्जा खर्च नहुने बताइएको छ। बाँकी १० किलोमिटर क्षेत्र पनि सरकारी बुट्यान क्षेत्रमा पर्ने भएकाले आयोजना छिटो र कम लागतमा सम्पन्न गर्न सकिनेछ।

२५ वर्षअघि विश्व बैंकको सहयोगमा भएको अध्ययनले समेत सो क्षेत्रमा ३ अर्ब रुपियाँको लागतमा सडक निर्माण गर्न सकिने देखाएको थियो।

यो वैकल्पिक मार्ग सञ्चालनमा आएपछि दिनहूँ २० हजारभन्दा बढी सवारीसाधन गुड्ने पृथ्वी राजमार्गको चाप उल्लेख्य रूपमा घट्नेछ। साथै विपत्का बेला पनि सङ्घीय राजधानी काठमाडौँलाई मुलुकको बाँकी भूभागसँग सधैँ जोडिइराख्न यसले महत्वपूर्ण ‘लाइफलाइन‘ (जीवनरेखा) को रूपमा काम गर्ने विश्वास लिइएको छ।