भोटेकोशी बाढीको वास्तविक कारण खोज्न मन्त्रालयले वैज्ञानिक अध्ययन गर्ने, सोमबार विज्ञ समिति गठन गरिँदै

काठमाडौँ, भदौ २८ गते । ऊर्जा, जलस्रोत तथा सिँचाइ मन्त्रालयले रसुवाको भोटेकोशी नदीमा आएको विनाशकारी बाढीको वैज्ञानिक आधार र वास्तविक कारण खोज्न तीन चरणको विस्तृत अध्ययन प्रक्रिया अगाडि बढाएको छ।

बाढीको उत्पत्ति, हिमाली भू–जोखिम, घटनाक्रम र जलवायु परिवर्तनको सम्भावित भूमिकाबारे अध्ययन गर्न मन्त्रालयले सोमबार विषयगत विज्ञहरूसहितको एक उच्चस्तरीय समिति गठन गर्न लागेको मन्त्रालयका प्रवक्ता मोहन कुमार शाक्यले जानकारी दिनुभयो।

जल तथा ऊर्जा आयोगको सचिवालयको प्रारम्भिक अध्ययन अनुसार भोटेकोशी घटनाको उत्पत्ति कसरी र कहाँबाट भयो भन्ने पर्याप्त वैज्ञानिक प्रमाण नभेटिएकाले यसलाई सामान्य अतिवृष्टि नभई ‘श्रृङ्खलाबद्ध विपद्‘ का रूपमा हेरिएको छ। अध्ययन टोलीले उच्च हिमाली क्षेत्रदेखि तटीय क्षेत्रसम्मको क्षति, भौतिक कारण तथा मानवजनित जलवायु परिवर्तनको असरको मूल्याङ्कन गर्नेछ। यस अध्ययनका लागि हिमनदी, भूगर्भ, जलविज्ञान, मौसम र विपद् व्यवस्थापन लगायतका विज्ञहरू संलग्न रहनेछन्।

भोटेकोशी–ल्हेन्दे नदी प्रणालीको सीमापार प्रकृतिलाई ध्यानमा राख्दै अध्ययनमा चीनतर्फ उपलब्ध वैज्ञानिक तथा जलवैज्ञानिक सूचनाहरूसमेत समेटिनेछ। स्थलगत निरीक्षणका लागि ड्रोन र स्याटेलाइट अवलोकनको प्रयोग गरिनेछ भने मन्त्रालयले विज्ञ समितिलाई अध्ययन प्रतिवेदन पेस गर्न दुई महिनाको कार्यादेश (ToR) दिने तयारी गरेको छ।