11/18/2026, 17:47:03
बुधबार, मङि्सर ०३, २०८३

मुलुकमा ८ सुरुङमार्ग निर्माणाधीन, २३ वटा अध्ययनको क्रममा : सिद्धबाबा सुरुङ कात्तिकभित्र सञ्चालनमा ल्याइने


काठमाडौँ, साउन २२ गते । नेपाल औपचारिक रूपमा आधुनिक सुरुङमार्गको युगमा प्रवेश गरेको छ। नागढुङ्गा–सिस्नेखोला सुरुङमार्ग सञ्चालनमा आएसँगै देशका अन्य भागमा पनि सुरुङ निर्माणले तीव्रता पाएको छ। हाल सिद्धार्थ राजमार्गको सिद्धबाबा र काठमाडौँ–तराई/मधेश द्रुतमार्ग अन्तर्गतका ७ वटा गरी जम्मा ८ वटा सुरुङमार्ग निर्माणको चरणमा रहेका छन्।

यसै आर्थिक वर्षमा अन्य २३ वटा प्रस्तावित सुरुङमार्गको अध्ययनका लागि सरकारले ६७ करोड एक लाख रुपियाँ बजेट विनियोजन गरेको छ। निर्माणाधीन सिद्धबाबा सुरुङमार्गको काम ९२ प्रतिशत सम्पन्न भइसकेको छ र आवश्यक उपकरण जडान गरी आगामी कात्तिकभित्र यसलाई सञ्चालनमा ल्याउने लक्ष्य राखिएको छ।

सुरुङमार्गको विस्तारले घुमाउरो तथा जोखिमयुक्त पहाडी बाटोलाई छोट्याएर यात्राको समय र इन्धनको लागत भारी मात्रामा घटाउनेछ। यसले आन्तरिक व्यापार, कृषि उपजको आपूर्ति र पर्यटन प्रवर्धनमा महत्त्वपूर्ण योगदान पुर्‍याउँदै मुलुकको समग्र आर्थिक गतिशीलतालाई बढावा दिनेछ।

निर्माणाधीन सुरुङमार्गहरू (८ वटा)

क्र.सं. सुरुङमार्गको नाम स्थान / राजमार्ग
१ सिद्धबाबा सुरुङमार्ग सिद्धार्थ राजमार्ग
२ धेन्द्रे सुरुङमार्ग काठमाडौँ–तराई/मधेश द्रुतमार्ग
३ लेनडाँडा सुरुङमार्ग काठमाडौँ–तराई/मधेश द्रुतमार्ग
४ महादेवटार सुरुङमार्ग काठमाडौँ–तराई/मधेश द्रुतमार्ग
५ चन्द्रामभिर सुरुङमार्ग काठमाडौँ–तराई/मधेश द्रुतमार्ग
६ देवीचौर सुरुङमार्ग काठमाडौँ–तराई/मधेश द्रुतमार्ग
७ सिसौटार सुरुङमार्ग काठमाडौँ–तराई/मधेश द्रुतमार्ग
८ माउरीभिर सुरुङमार्ग काठमाडौँ–तराई/मधेश द्रुतमार्ग

अध्ययनको क्रममा रहेका सुरुङमार्गहरू (२३ वटा)

क्र.सं. सुरुङमार्गको नाम सम्बन्धित जिल्ला / क्षेत्र
१ कुलेखानी–भीमफेदी सुरुङमार्ग मकवानपुर
२ खुर्कोट–सिन्धुली सुरुङमार्ग सिन्धुली
३ लामाबगर सुरुङमार्ग दोलखा
४ धरान–लेउती सुरुङमार्ग सुनसरी
५ खुटिया–बिपी नगर–दिपायल सुरुङमार्ग कैलाली र डोटी
६ गोदावरीकुण्ड–काभ्रे–मनेदोभान सुरुङमार्ग ललितपुर र काभ्रेपलाञ्चोक
७ बागलुङ–ब्युँ नरेठाँटी सुरुङमार्ग बागलुङ
८ प्रबास–जोर्ते सुरुङमार्ग पाल्पा
९ पाटन–ब्याउलिढुङ्गा र इमिलचा सुरुङमार्ग जाजरकोट र जुम्ला
१० ताथली–रविओपी सुरुङमार्ग भक्तपुर र काभ्रेपलाञ्चोक
११ बबई–छिन्चु सुरुङमार्ग सुर्खेत
१२ सुनमाई राजदुबोल सुरुङमार्ग इलाम
१३ मझिमटार–शक्तिखोर सुरुङमार्ग धादिङ र चितवन
१४ हेम्जा–नयाँपुल सुरुङमार्ग कास्की र पर्वत
१५ दुम्कीबास–बर्दघाट सुरुङमार्ग नवलपरासी (बर्दघाट सुस्तापूर्व)
१६ फुर्सुखोला छोहरे पाटन–गुढीकोला सुरुङमार्ग कास्की र स्याङ्जा
१७ दोलालघाट–चन्द्रवती सुरुङमार्ग काभ्रेपालाञ्चोक र दोलखा
१८ हात्तीसार–बबई सुरुङमार्ग सुर्खेत
१९ शिवपुर–भालुवाङ सुरुङमार्ग दाङ
२० रानीघाट–भुरीगाउँ सुरुङमार्ग सुर्खेत र बर्दिया
२१ दनुवाताल सुरुङमार्ग बर्दिया
२२ खुर्कोट–चियाबारी सुरुङमार्ग सिन्धुली
२३ टोखा–छहरे गुर्जुभञ्ज्याङ सुरुङमार्ग काठमाडौँ र नुवाकोट