‘ब्रोड पिक’मा हिमपहिरो : ४ जनाको शव फेला, निर्मल पुर्जासहित ६ जना बेपत्ता

काठमाडौँ, साउन १५ गते । पाकिस्तानस्थित विश्वको १२ औँ अग्लो हिमाल ‘ब्रोड पिक’ मा बिहीबार मध्याह्न गएको हिमपहिरोमा परी चार जना आरोहीको मृत्यु भएको छ भने चर्चित आरोही निर्मल पुर्जासहित ६ जना बेपत्ता भएका छन्।

खराब मौसमका बिच उद्धार टोलीले फेला परेका चार वटा शव सङ्कलन गर्ने प्रयास गरिरहेको छ। गिल्गित-बाल्टिस्तान क्षेत्रका पर्यटन विभागका उपनिर्देशक साजिद हुसेनलाई उद्धृत गर्दै अलजजिराले लेखेको खबर अनुसार बाँकी छ जना बेपत्ता आरोहीको खोजी दुर्गम तथा जटिल क्षेत्रमा केन्द्रित गरिएको छ।

अल्पाइन क्लब अफ पाकिस्तानका अनुसार १० जनाको टोली (६ नेपाली, १ पाकिस्तानी, १ ओमानी, १ अमेरिकी र १ चिनियाँ) आरोहणका क्रममा हिमपहिरोमा परेको थियो। मृतकहरूमा नेपालका पुरबहादुर गुरुङ र ओमानकी नधिरा अहमद अब्दुल्लाह अल हार्थीको पहिचान भएको छ।

बेपत्ता हुनेमा निर्मल पुर्जाका साथै किली पेम्बा शेर्पा, निमा शेर्पा, नवाङ थिन्दु शेर्पा र ग्यालु शेर्पा रहेका छन्। जिपिएस लोकेसनका अनुसार उनीहरूलाई हिमपहिरोले करिब १,००० मिटर तल पुरेको अनुमान छ। खराब मौसमका बिच पाकिस्तान सेनाका दुई हेलिकोप्टरसहित विशेष टोली उद्धारमा खटिएको छ।