लोकतन्त्र र राष्ट्रियताको रक्षाका लागि संघर्षको तयारीमा जुट्न एमाले अध्यक्ष ओलीको निर्देशन

काठमाडौँ, असोज १८ गते । नेकपा (एमाले) का अध्यक्ष केपी शर्मा ओलीले लोकतन्त्र, संविधान र राष्ट्रियताको रक्षाका लागि सम्पूर्ण पार्टी पंक्तिलाई सङ्घर्ष र आन्दोलनको तयारीमा जुट्न निर्देशन दिनुभएको छ।

च्यासलस्थित पार्टी केन्द्रीय कार्यालयमा आइतबार बसेको एमाले संसदीय दलको बैठकलाई सम्बोधन गर्दै अध्यक्ष ओलीले शान्तिपूर्ण सङ्घर्षका दुईवटा मोर्चा रहेको उल्लेख गर्दै सो निर्देशन दिनुभएको हो।

बैठकपछि जानकारी दिँदै प्रमुख सचेतक ऐन महरले नेपाली जनताले चाहे अनुरूप परिवर्तन र जन-आकाङ्क्षा अझै पूरा हुन नसकेको बताउनुभयो। जनताको जन-जीविकाका तत्कालीन तथा दीर्घकालीन सवालहरू सम्बोधन गर्न र लोकतन्त्रको रक्षाका लागि नेकपा (एमाले) लगायतका लोकतान्त्रिक शक्तिहरू एकै ठाउँमा उभिनुपर्ने विषयमा बैठकमा गहन छलफल भएको उहाँले जानकारी दिनुभयो।

संसदीय दलको बैठकमा वर्तमान सरकारको कार्यशैली र भूमिकामाथि गम्भीर प्रश्न उठाइएको छ। सरकारले संसद्लाई जनताप्रति उत्तरदायी बनाउन नसकेको र जनमतको घोर उपेक्षा गर्दै संसद्लाई एक प्रकारको कठपुतली बनाउन खोजेको गम्भीर आरोप एमालेले लगाएको छ।

अन्तमा, एमालेले संसद् र सडक दुवै मोर्चाबाट जनताका मुद्दाहरू सशक्त रूपमा उठाउने रणनीति तय गरेको छ। लोकतन्त्र र संविधानमाथि आँच आउन नदिन तथा जन-जीविकाका सवालमा सरकारलाई जवाफदेही बनाउन एमालेले आगामी दिनमा आफ्ना सङ्घर्षका कार्यक्रमहरू थप सशक्त बनाउने सङ्केत गरेको छ।