संसददेखि पार्टीभित्रसम्म खुलामञ्च र खुला संवाद आवश्यक, ‘म्युजिकल चियर’ राजनीतिले जनतामा वितृष्णा: गगन थापा

काठमाडौँ, असोज १८ गते । नेपाली कांग्रेसका सभापति गगनकुमार थापाले संसददेखि राजनीतिक दलभित्रसम्म जनताका प्रश्न, असहमति र विचारका लागि खुला ठाउँ आवश्यक रहेको बताउनुभएको छ।

नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै थापाले १० वर्षपछि खुलामञ्च खुलेको उल्लेख गर्दै यो काठमाडौँको एउटा चौर मात्र नभई फरक विचार र मतभेदलाई एउटै ठाउँमा ल्याएर संवाद गर्ने ऐतिहासिक थलो भएको बताउनुभयो।

सभापति थापाले संसद र पार्टीभित्र पर्याप्त खुलापन नभएकाले देशलाई भौतिक तथा विद्युतीय दुवै माध्यममा खुलामञ्च आवश्यक रहेको जोड दिनुभयो। सत्तामा रहेकाहरूले जनताको प्रश्न सुन्नुपर्ने र लोकतन्त्रमा जनताको आवाज बन्द गर्न नमिल्ने भन्दै उहाँले पार्टीभित्र पनि नेतालाई प्रश्न गर्दा सदस्यता नकाटिने र फरक मतलाई सम्मान गर्ने लोकतान्त्रिक संस्कारको विकास गर्नुपर्ने धारणा राख्नुभयो।

सम्बोधनका क्रममा थापाले सत्ता र नेतृत्वमा उही अनुहार दोहोरिरहने प्रवृत्तिले नेपालको राजनीति ‘म्युजिकल चियर‘ जस्तै बनेको टिप्पणी गर्नुभयो। पटक-पटक प्रधानमन्त्री, मन्त्री र नेता बनिरहने र सत्ता नछाड्ने प्रवृत्तिले सबै दल र नेता खराब हुन् भन्ने गलत सन्देश जनतामा गएको र त्यसकै परिणति स्वरूप नागरिक असन्तुष्टि भुसको आगोझैँ फैलिएको उहाँको भनाइ थियो।

अन्तमा, सभापति थापाले समाजमा अत्यधिक राजनीतिकरण (हाइपर पोलिटिक्स) बढेको भन्दै अब गम्भीर समीक्षा गर्ने समय आएको बताउनुभयो। ३५ वर्षको अवधिमा गाउँहरू रित्तिनु र युवा पलायन हुनुका कारणहरू खोज्दै कांग्रेसले लोकतन्त्रलाई जनताको प्रत्यक्ष सेवा, रोजगारी र परिणामसँग जोड्ने पुलको रूपमा काम गर्नुपर्नेमा उहाँले जोड दिनुभयो।