गगन थापाको नेतृत्व निरन्तरतामा क्रमभंगता, देशको नेतृत्व गर्न साथ दिन्छौँ: नेकपा संयोजक प्रचण्ड

काठमाडौँ, असोज १८ गते । नेकपाका संयोजक पुष्पकमल दाहाल ‘प्रचण्ड’ले नेपाली कांग्रेसका सभापति गगनकुमार थापाले पार्टी नेतृत्वमा निरन्तरताको क्रमभंग गरेर नयाँ इतिहासतर्फ अघि बढेको बताउनुभएको छ।

नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै प्रचण्डले थापालाई बधाई दिँदै उहाँभित्रको नेतृत्व क्षमता आफूले स्वास्थ्यमन्त्री रहँदा नै देखेको र देशकै नेतृत्व गर्ने ठाउँमा पुग्ने आकलन गरेको स्मरण गर्नुभयो।

सम्बोधनका क्रममा प्रचण्डले विषम राजनीतिक परिस्थितिका बीच थापा कांग्रेसको नेतृत्वमा आउनु आफैँमा साहसिक र ऐतिहासिक कदम भएको टिप्पणी गर्नुभयो। उहाँले पार्टीभित्र छुटेका वा असन्तुष्ट रहेका नेता तथा समूहहरूलाई समेटेर कांग्रेसलाई थप एकताबद्ध बनाई अघि बढाउन थापालाई विशेष आग्रहसमेत गर्नुभयो।

प्रचण्डले थापा अब पार्टीको नेतृत्वमा मात्र सीमित नरहेर मुलुककै नेतृत्व गर्ने बाटोमा अघि बढ्नुपर्ने र त्यसका लागि आफ्नो पूर्ण साथ र सहयोग रहने प्रतिबद्धता जनाउनुभयो।

साथै, उहाँले मुलुकमा गणतन्त्र र लोकतन्त्र अझै जोखिममा पर्न सक्ने सम्भावना रहेकाले यसलाई संस्थागत र संरक्षण गर्न प्रमुख राजनीतिक शक्तिहरूबीच सहकार्य हुनुपर्नेमा जोड दिनुभयो।

अन्तमा, शान्ति सम्झौताका बाँकी कामहरू समयमै टुंग्याउन नसके मुलुक पुनः द्वन्द्वतर्फ धकेलिने जोखिम औँल्याउँदै ती बाँकी कार्यहरू पूरा गर्ने जिम्मेवारी पनि गगन थापाको काँधमा आएको बताउनुभयो। सबै राजनीतिक दलहरू मिलेर समृद्ध नेपालको विकास अभियानमा अघि बढ्नुपर्नेमा उहाँले जोड दिनुभयो।