सरकार ढल्छ भन्नेहरू नै ढल्छन्, रास्वपा नेतृत्वको सरकार बलियो छ: सभापति रवि लामिछाने

काठमाडौँ, असोज १८ गते । सत्तारुढ दल राष्ट्रिय स्वतन्त्र पार्टी (रास्वपा) का सभापति रवि लामिछानेले बाहिर हल्ला भएजस्तो सरकार कमजोर नरहेकाले नढल्ने दाबी गर्नुभएको छ।

नेपाली कांग्रेसको १५ औं महाधिवेशनको उद्घाटन सत्रलाई सम्बोधन गर्दै उहाँले दसंै, तिहार वा छठपछि सरकार ढल्छ भन्ने भ्रम फैलाइएको तर सरकार पूर्ण रूपमा बलियो रहेको र ढल्छ भन्नेहरू स्वयं ढल्ने बताउनुभयो।

सम्बोधनका क्रममा सभापति लामिछानेले देश बनाउने अभियानमा रास्वपाले सबै राजनीतिक दलहरूलाई साथमा लिएर अघि बढ्ने स्पष्ट पार्नुभयो। सरकारको काम गर्ने शैली र नियत सही रहेको उल्लेख गर्दै उहाँले मुलुकमा परिवर्तनको मुद्दा र एजेन्डाको नेतृत्व रास्वपाले गरिरहेको धारणा राख्नुभयो।

लामिछानेले रास्वपा नेतृत्वको सरकारले देशको लोकतन्त्र र अर्थतन्त्रलाई कहिल्यै कमजोर हुन नदिने दृढ प्रतिबद्धता व्यक्त गर्नुभयो। जनताले निर्वाचनमार्फत अत्यधिक भोट दिएर रास्वपालाई ठूलो पार्टी बनाएको स्मरण गराउँदै उहाँले जनताको विश्वास र परिवर्तनको मुद्दामा पार्टी सदैव गम्भीर र जिम्मेवार रहने बताउनुभयो।

अन्तमा, उहाँले रास्वपाले लोकतन्त्रको हुर्मत लिने काम कहिल्यै नगर्ने र अन्य कुनै पनि दललाई त्यसो नगर्न आग्रह गर्नुभयो। जनताको मन जित्ने गरी सरकारले काम गरिरहेको दाबी गर्दै सभापति लामिछानेले १५ औं महाधिवेशनमा आफ्नो दललाई निमन्त्रणा गरेकोमा नेपाली कांग्रेसलाई धन्यवाद ज्ञापन गर्नुभयो।