विद्युत वितरण प्रणाली सुदृढीकरण: उपत्यकामा तार भूमिगत गर्ने काम ९० प्रतिशतभन्दा बढी सम्पन्न

काठमाडौँ, असोज २५ गते । नेपाल विद्युत प्राधिकरणले काठमाडौँ उपत्यकालगायत प्रमुख सहरी क्षेत्रमा विद्युतीय तार भूमिगत गर्ने कार्यलाई तीव्र पारिएको जनाएको छ। प्राधिकरणका अनुसार काठमाडौँ उपत्यकामा यस आयोजनाको भौतिक प्रगति ९० प्रतिशतभन्दा बढी पुगेको छ।

बढ्दो विद्युतीय मागलाई सम्बोधन गर्न र सेवालाई थप भरपर्दो बनाउन नेपाल विद्युत प्राधिकरणले सडक विभाग र स्थानीय तहको समन्वयमा सहरी क्षेत्रमा तार भूमिगत गर्ने काम अघि बढाएको हो। एसियाली विकास बैङ्क (एडीबी) को आर्थिक सहकार्यमा भइरहेको यस आयोजनाको कुल लागत करिब २५ देखि ३० अर्ब रुपैयाँ रहेको छ।

प्राधिकरणका अनुसार पुराना तथा साँघुरा सहरहरूमा तार बिछ्याउँदा खानेपानीका पाइप, टेलिफोन र इन्टरनेटका तारहरू एकै ठाउँमा हुँदा केही कठिनाइ उत्पन्न हुने गरेको छ। यद्यपि, काम सम्पन्न भएका क्षेत्रहरूमा तारलाई सुरक्षित रूपमा भूमिगत गर्ने कार्य अन्तिम चरणमा पुगेको छ।

काठमाडौँ उपत्यका मध्य तथा उत्तर वितरण प्रणाली अन्तर्गत महाराजगञ्ज क्षेत्रमा भौतिक प्रगति ९४ प्रतिशत पुगेको छ, जहाँ २४६ कि.मी. एचटी र ३६० कि.मी. एलटी तार बिछ्याइएको छ। यसैगरी, रत्नपार्क–बानेश्वर क्षेत्रमा पूर्व तथा दक्षिण वितरण प्रणाली अन्तर्गत भौतिक प्रगति ९७ प्रतिशत पुगेर २८८ कि.मी. एचटी र ३६७ कि.मी. एलटी तार जडान सम्पन्न भएको छ।

बानेश्वर, बालाजु, कुलेश्वर, कीर्तिपुर र जोरपाटीसहितको उपत्यका पश्चिम क्षेत्रमा भौतिक प्रगति ९५ प्रतिशत पुगेको छ र २९६ कि.मी. एचटी तथा २५२ कि.मी. एलटी तार बिछ्याइएको छ। साथै, ललितपुर–भक्तपुर क्षेत्रमा भौतिक प्रगति ६१ प्रतिशत पुगेको छ भने पोखरा–भरतपुर क्षेत्रमा गण्डकी तथा चितवन क्षेत्र समेट्दै ८३ प्रतिशत प्रगति हासिल गरी पाइप र केबल बिछ्याउने कार्य जारी छ।