‘आर्ट फर रिलिफ’: कलाकृति बिक्रीबाट २ लाख ८६ हजार सङ्कलन

काठमाडौँ, भदौ १८ गते । दरबारमार्गस्थित ग्यालरी १०८ ले भोटेकोशी बाढीबाट प्रभावित नागरिकका लागि सञ्चालन गरेको ‘आर्ट फर रिलिफ’ अभियानबाट दुई लाख ८६ हजार रुपियाँ सङ्कलन भएको छ।

ग्यालरीका संस्थापक सुगतरत्न शाक्यका अनुसार प्राप्त २८ वटा कलाकृतिमध्ये ११ वटा बिक्री भई सो रकम जम्मा भएको हो। बिक्रीबाट प्राप्त शतप्रतिशत रकम बाढीपीडितलाई खाना, आश्रय र अत्यावश्यक सामग्री उपलब्ध गराउन खर्च गरिनेछ।

यस राहत अभियानमा उमेश श्रेष्ठ, समुन्द्रमान शाक्य, सविता डङ्गोल, ईशान परियार लगायत दुई दर्जनभन्दा बढी कलाकारहरूले आफ्ना सिर्जना प्रदान गरेका छन्। साथै, अभिनेत्री प्रियङ्का कार्की लगायत अन्य रङ्गकर्मी तथा गायक/गायिका पनि सहयोग जुटाउन सक्रिय छन्। यस्तै, नेपाल ललितकला प्रज्ञा–प्रतिष्ठानले पनि ‘मानवताको लागि कला’ शीर्षकमा राष्ट्रिय खुला चित्रकला प्रदर्शनीको आह्वान गरेको छ।

‘आर्ट फर रिलिफ’ (ग्यालरी १०८) मा सहभागी कलाकारहरू

यसैबिच, कलाकारहरूको समूह ‘आर्ट बुम‘ ले बाढीपीडितकै सहयोगार्थ भदौ १९ देखि २१ गतेसम्म नयाँबजारस्थित नेपा ब्याङ्क्वेटमा ‘आर्ट फर होप’ कला प्रदर्शनी आयोजना गर्ने भएको छ। करिब २५ जना सिनियर तथा युवा कलाकारहरूका चित्रकला बिक्री गरी सङ्कलित रकम सरकारलाई हस्तान्तरण गरिने अध्यक्ष रत्न शाक्यले जानकारी दिनुभयो।

‘आर्ट फर होप‘ (आर्ट बुम) मा सहभागी कलाकारहरू