गगन थापाको राजनीतिक प्रतिवेदन: ‘राष्ट्रिय पुनर्जागरण र समुन्नतिको आगामी दशक’ को दृष्टिकोण सार्वजनिक

काठमाडौँ, असोज १९ गते । नेपाली कांग्रेसका सभापति गगनकुमार थापाले देश, लोकतन्त्र र कांग्रेसको आगामी राजनीतिक दिशा निर्धारण गर्न ‘राष्ट्रिय पुनर्जागरण र समुन्नतिको आगामी दशक‘ शीर्षकको दृष्टिकोण अघि सार्नुभएको छ।

पार्टीको १५औँ महाधिवेशनअन्तर्गत सोमबार हुने बन्दसत्रमा सभापति थापाले आफ्नो राजनीतिक प्रतिवेदन प्रस्तुत गर्दै आगामी दशकका लागि वैचारिक, राजनीतिक, संगठनात्मक र राष्ट्रिय कार्यदिशा सार्वजनिक गर्नुभएको हो।

प्रतिवेदनमा विगतका राजनीतिक संघर्ष र प्राप्त उपलब्धिको ऐतिहासिक समीक्षा गर्दै पछिल्लो समय कांग्रेसमा देखिएको सत्ताकेन्द्रित राजनीति, संगठनात्मक कमजोरी र युवापुस्तासँग बढेको दूरीप्रति गम्भीर आत्मसमीक्षा गरिएको छ।

दुई दशकको राजनीतिक अभ्यासमा मूल उद्देश्यभन्दा पद र सत्तालाई प्राथमिकता दिइएको स्वीकार गर्दै थापाले कांग्रेसलाई केवल निर्वाचनका बेला मात्र नभई निरन्तर जनताको माझमा रहने जिम्मेवार राष्ट्रिय शक्तिका रूपमा विकास गर्ने प्रस्ताव गर्नुभएको छ।

वैचारिक रूपमा २१औँ शताब्दीको परिवेश अनुकूल राष्ट्रियता, लोकतन्त्र र लोकतान्त्रिक समाजवादलाई नयाँ ढङ्गले पुनर्व्याख्या गरिएको छ। राष्ट्रियतालाई स्वाधीनता र सामूहिक स्वशासन, लोकतन्त्रलाई नागरिकको स्वामित्व र लोकतान्त्रिक समाजवादलाई सामाजिक-आर्थिक स्वतन्त्रतासँग जोड्दै प्रतिवेदनले ‘समुन्नत नेपाल‘ को बृहत् अवधारणा अघि सारेको छ, जसलाई केवल आर्थिक वृद्धिमा सीमित नराखी नागरिकको सामर्थ्य र अवसरको विकाससँग जोडिएको छ।

संगठनात्मक रूपमा आगामी कांग्रेस ‘विचारमा स्पष्ट, संगठनमा जीवन्त र जनताप्रति जवाफदेही‘ हुनुपर्ने खाका प्रस्तुत गरिएको छ। आन्तरिक लोकतन्त्र सुदृढीकरण, पाँच पुस्ताको सहयात्रा, जनप्रतिनिधिका लागि उच्च नैतिक मापदण्ड, स्वच्छ वित्तीय आधार र पारदर्शितालाई जोड दिँदै थापाले आगामी चार वर्षको नेतृत्वकालमार्फत आगामी दशकका लागि ठोस परिणाम हासिल गर्ने रणनीतिक योजना अघि सार्नुभएको छ।