पृथ्वीचोकमा आज डोजर चल्ने, फिर्केमा १०५ संरचना हटाइयो

लेखनाथ, जेठ १४ गते । पोखरा महानगरपालिकाले सार्वजनिक जग्गा, सडक तथा खोलानाला अतिक्रमण गरी बनाइएका संरचना हटाउने अभियानलाई तीव्रता दिएको छ । पोखराको पृथ्वीचोकस्थित हङकङ बजार अगाडि सङ्घसंस्थाले प्रयोग गर्दै आएका भवनहरू बिहीबार भत्काइने भएको छ ।

यसअघि ३५ दिने सूचना जारी गर्दै संरचना हटाउन आग्रह गरेको महानगरपालिकाले बुधबार माइकिङ गरी बिहीबार बिहान ११ बजेदेखि डोजर चलाइने जानकारी दिएको थियो । उक्त क्षेत्रमा सहारा क्लब, सामुदायिक प्रहरी सेवा केन्द्र, जिफन्ट गण्डकी, ट्रेड युनियन कांग्रेस, हिमाली सांस्कृतिक परिवार लगायत विभिन्न सङ्घ-संस्थाका भवन रहेका छन् । पोखरा उपत्यका नगर विकास समितिको स्वामित्वमा रहेको जग्गामा बनेका ती भवनहरू सङ्घ-संस्थाले उपयोग गर्नुका साथै भाडामा समेत लगाएका थिए ।

महानगरका प्रमुख धनराज आचार्यले संरचना हटाएर सडक फराकिलो बनाइने बताउनुभयो । “यी संरचना हटाएर पृथ्वीचोकबाट नयाँबजार जाने सडक दुईतर्फी बनाइनेछ,” उहाँले भन्नुभयो, “यस आसपासमा रहेका सुकुम्बासीका घरहरू पनि उचित व्यवस्थापनसहित चाँडै खाली गरिनेछ ।”

यता, फिर्केखोलाको बहाव क्षेत्रमा बनेका संरचना हटाउने अभियान चार दिनदेखि जारी छ । बुधबार मात्रै साना–ठुला गरी २३ वटा संरचना हटाइएको महानगरले जनाएको छ । वडा नं. १८ र २ को सीमाना क्षेत्रमा आठ वटा संरचना हटाइएका छन् भने वडा नं. ४ र ५ मा चार वटा संरचना भत्काइएको छ । वडा नं. ७ र ८ मा पाँच वटा कम्पाउन्ड वाल र छ वटा स्थायी संरचना हटाइएको छ ।

आइतबारबाट सुरु भएको अभियानमा बुधबारसम्म आइपुग्दा फिर्केखोलाको बहाव क्षेत्रबाट एक सय पाँच वटा संरचना हटाइसकिएको छ । करिब आठ किलोमिटर लामो फिर्केखोलाको बहाव क्षेत्रमा एक सय ६० भन्दा बढी संरचना रहेको महानगरको तथ्याङ्क छ । तीन स्थानबाट सञ्चालन गरिएको अभियानमा तीन वटा जेसिबी र दुई वटा एक्साभेटर प्रयोग गरिएको छ ।

महानगरले फिर्केखोलाको बहाव क्षेत्र खाली गरिसकेपछि त्यसलाई आकर्षक पर्यटन गन्तव्यका रूपमा विकास गर्ने योजना बनाएको छ । साइकल मार्ग, फुटपाथ, हरियाली प्रवर्द्धन र लाइटिङसहित सुरक्षित फिर्के करिडोर निर्माण गरिने जनाएको छ । साथै, पोखरा बसपार्क क्षेत्र पनि चाँडै खाली गरी आधुनिक बसपार्क निर्माण सुरु गर्ने तयारी महानगरपालिकाले गरेको छ ।

– फडिन्द्र अधिकारी