राष्ट्रिय जीवन बीमा कम्पनीद्वारा आफ्नो दोस्रो वार्षिक साधारणसभा आह्वान

काठमाडौं, चैत्र १ । राष्ट्रिय जीवन बीमा कम्पनीले आफ्नो दोस्रो वार्षिक साधारणसभा आह्वान गरेको छ।

कम्पनी सञ्चालक समितिको बैठकले साधारणसभा यही चैत २७ गते आयोजना गर्ने निणय गरेको हो। सभा काठमाडौंको रामशाहपथस्थित कम्पनीको प्रधान कार्यालयमा अपराह्न ३ बजेबाट सुरु हुनेछ।

सभाले कम्पनीको प्रबन्धपत्र र नियमावलीमा संशोधन तथा कुनै फेरबदलका लागि नेपाल सरकार वा नियमनकारी निकायबाट कुनै सुझाव प्राप्त भएमा सोहीबमोजिम गर्न सञ्चालक समितिलाई अख्तियारी प्रदान गर्ने विशेष प्रस्ताव पारित गर्नेछ।

सोही सभाले आर्थिक वर्ष २०७४।७५ र २०७५।७६ सम्मको वासलात, नाफा नोक्सान हिसाब, सोही अवधिको नगद प्रवाह विवरणलगायतका वित्तीय विवरणसहित अनुसूचीहरु छलफल गरी पारित गर्नेछ। सभाले उक्त आर्थिक वर्षको वार्षिक तथा लेखापरीक्षकको प्रतिवेदन स्वीकृत गर्नेछ।