गौरा पर्वको अवसरमा कञ्चनपुरका ६ पालिकामा स्थानीय बिदा, सोमबारदेखि मात्रै कार्यालय खुल्ने

कञ्चनपुर, भदौ १८ गते । सुदूर-पश्चिमेलीहरूको महान् चाड गौरा पर्वको अवसरमा कञ्चनपुरका ६ वटा स्थानीय तहले बिहीबार (आज) स्थानीय बिदा दिएका छन्। भीमदत्त, बेलौरी, शुक्लाफाँटा र पुनर्वास नगरपालिकाका साथै बेलडाँडी र लालझाँडी गाउँपालिकाले सूचना जारी गर्दै पर्वलाई हर्षोल्लासका साथ मनाउन सहज होस् भन्ने उद्देश्यले बिहीबार अत्यावश्यकबाहेकका सम्पूर्ण सेवा, वडा कार्यालय तथा शैक्षिक संस्थाहरूमा बिदा दिने निर्णय गरेका हुन्।

शुक्रबार सङ्घीय सरकारले समेत गौरा पर्वको उपलक्ष्यमा देशभर/क्षेत्रीय रूपमा सार्वजनिक बिदा दिएकाले शनिबार र आइतबारको नियमित बिदापछि यी पालिकासहितका सरकारी कार्यालयहरू आगामी सोमबारदेखि मात्र पूर्ण रूपमा सञ्चालनमा आउने भएका छन्। मङ्गलबार पञ्चमीका दिन बिरुडा भिजाएर सुरु भएको गौरा पर्वअन्तर्गत आज सप्तमीका दिन गौरा देवीलाई नजिकको मठ–मन्दिरमा भित्र्याएर पूजाअर्चना गरी महिलाहरूले दुबधागो चढाउने प्रचलन छ।

व्रतालु महिलाहरूले अष्टमीका दिन दुबधागो अभिषेक गरी घाँटीमा धारण गरेर देवीको पूजा गर्छन्। सुदूरपश्चिममा महिलाहरूले धारणा गर्ने दुबधागोको धार्मिक महत्त्व पुरुषले लगाउने जनैसरह मानिन्छ। धार्मिक एवं ऐतिहासिक धरोहरका रूपमा रहेको गौरा पर्वले मौलिक संस्कृति र परम्पराको संरक्षणमा ठुलो योगदान पुर्‍याउँदै आएको छ।