राजमार्गमा सवारी चाप बढेपछि दुई सडकमा एकतर्फी यातायात सञ्चालन

मकवानपुर, भदौ १६ गते । पृथ्वी राजमार्गअन्तर्गत धादिङको कृष्णभीरमा पहिरोका कारण सडक अवरुद्ध भएपछि हेटौँडा हुँदै काठमाडौँ आवत-जावत गर्ने वैकल्पिक राजमार्गहरूमा सवारी साधनको अत्यधिक चाप बढेको छ। यसलाई व्यवस्थित र सुरक्षित बनाउन जिल्ला प्रशासन कार्यालय मकवानपुरले मङ्गलबारदेखि लागू हुने गरी १० चक्कासम्मका ठूला मालवाहक तथा यात्रुवाहक सवारी साधनलाई त्रिभुवन राजपथबाट काठमाडौँ जाने र फर्किंदा कान्ति लोकपथ प्रयोग गर्ने गरी एकतर्फी व्यवस्था मिलाएको छ।

नयाँ व्यवस्था अनुसार १४ सिटभन्दा कम क्षमताका साना यात्रुवाहक सवारी साधनले काठमाडौँ जाँदा भीमफेदी–कुलेखानी–सिस्नेरी–दक्षिणकाली र हेटौँडा फर्किंदा फर्पिङ–फाखेल–कुलेखानी–भीमफेदी रुट प्रयोग गर्नुपर्नेछ। मौसम तथा सडकको जोखिमलाई ध्यानमा राख्दै कान्ति लोकपथ हुँदै आउने यात्रुवाहक सवारी साधनले अनिवार्य रूपमा साँझ ६ बजेभित्र मकवानपुरको ठिङ्गन चेकपोस्ट पार गरिसक्नुपर्ने समयसीमा तोकिएको छ।

साथै, त्रिभुवन राजपथको त्रिखण्डीनजिक रहेको बेलिब्रिजको भारवहन क्षमता कमजोर भएकाले इन्धन तथा भारी मालवाहक सवारीलाई पुल छेउको डाइभर्सन प्रयोग गर्न आग्रह गरिएको छ। विपद्को समय भएकाले अत्यावश्यक अवस्थामा मात्र यात्रा गर्न, सवारी चलाउँदा ओभरटेक नगर्न र ट्राफिक नियम तथा सुरक्षाकर्मीको निर्देशन पूर्ण रूपमा पालना गर्न प्रशासनले अनुरोध गरेको छ।