एमालेद्वारा प्रदेश सरकारलाई दिएको समर्थन फिर्ता

धनगढी, असार ३१ गते । नेपाल कम्युनिस्ट पार्टी (एमाले) ले सुदूरपश्चिम प्रदेश सरकारलाई दिएको समर्थन फिर्ता लिएको छ। मुख्यमन्त्री कमलबहादुर शाहले आज आफ्नो सरकारमा रहेका एमालेका मन्त्रीहरूलाई पदबाट बर्खास्त गरेपछि एमालेले सरकारलाई दिएको समर्थन फिर्ता लिने निर्णय गरेको हो।

एमाले संसदीय दलको आकस्मिक बैठकले वर्तमान प्रदेश सरकारलाई दिएको समर्थन औपचारिक रूपमा फिर्ता लिने निर्णय गरेको छ।

बजेट विवाद र मन्त्री बर्खास्तगी

आगामी आर्थिक वर्षको बजेट पुनर्लेखन नभएसम्म पारित गर्नका लागि सरकारलाई साथ नदिने एमालेको अडान थियो। बजेट पास नहुने स्पष्ट अवस्था सिर्जना भएपछि मुख्यमन्त्री शाहले एमालेका चार जना मन्त्रीहरूलाई पदबाट बर्खास्त गर्नुभएको हो।

मुख्यमन्त्रीमाथि एकलौटी गरेको आरोप

एमाले संसदीय दलका नेता राजेन्द्रसिंह रावलले सहमतिका लागि गरिएका सम्पूर्ण प्रयासहरूलाई बेवास्ता गर्दै मुख्यमन्त्री एकलौटी ढङ्गले अगाडि बढेको आरोप लगाउनुभयो। उहाँले मुख्यमन्त्री शाहले बजेटलाई आफ्नो निर्वाचन क्षेत्रमा मात्रै केन्द्रित गरेको दाबी समेत गर्नुभयो।

एमालेले समर्थन फिर्ता लिएसँगै सुदूरपश्चिम प्रदेश सरकार स्पष्ट अल्पमतमा परेको छ र प्रदेशको राजनीतिक समीकरणमा नयाँ फेरबदल आउने देखिएको छ।