नारायणगढ–मुग्लिन सडकखण्ड : पहिरो पन्छाएपछि यातायात दुईतर्फी सुचारु, जोखिम भने कायमै

चितवन, असार ४ गते । नारायणगढ–मुग्लिन सडकखण्डको इच्छाकामना गाउँपालिका वडा नम्बर ५ स्थित तुइनखोलामा खसेको पहिरो पन्छाएपछि बिहीबार बिहानदेखि यातायात सेवा दुईतर्फी रूपमै सञ्चालनमा आएको छ।

रातिदेखि अवरुद्ध बनेको थियो सडक

सडक डिभिजन कार्यालय भरतपुरका अनुसार बुधबार राति करिब ९:०० बजे तुइनखोला नजिकै डाँडोबाट ठूलो पहिरो खसेपछि सडक पूर्ण रूपमा अवरुद्ध भएको थियो। राजधानी काठमाडौँ र पोखरालाई देशको पूर्वी तथा पश्चिमी हिस्सासँग जोड्ने मुख्य लाइफलाइन मानिने यो सडकखण्ड रातिदेखि नै ठप्प हुँदा सयौँ सवारी साधन र हजाराँै यात्रीहरू बाटोमै अलपत्र परेका थिए।

बिहानैदेखि पहिरो पन्छाउने कार्य

सडक सुपरभाइजर ईश्वर क्षेत्रीका अनुसार पहिरो खसेको जानकारी पाउनसाथ सडक डिभिजन कार्यालयको टोली आवश्यक उपकरण (लोडर र एस्काभेटर) सहित राति नै परिचालन भएको थियो। तर, रातिको समयमा लेदो र ढुङ्गा खसिरहेका कारण काम गर्न केही कठिन भएको थियो। बिहीबार बिहानैदेखि तीव्र गतिमा पहिरो र लेदो पन्छाएपछि सडकलाई दुईतर्फी रूपमै सञ्चालनमा ल्याउन सफलता मिलेको क्षेत्रीले जानकारी दिनुभयो।

तुइनखोला क्षेत्रमा सदावहार जोखिम

यातायात सेवा सुचारु भए तापनि नारायणगढ–मुग्लिन सडकखण्डको तुइन खोला क्षेत्र यात्रुहरूका लागि अझै पनि जोखिमपूर्ण रहेको छ। यस क्षेत्रमा भौगोलिक संवेदनशीलताका कारण सामान्य वर्षा हुँदा वा सुख्खा मौसममा समेत माथिबाट ढुङ्गा र पहिरो खसिरहने समस्या छ। जसका कारण यस सडक भएर आवतजावत गर्ने चालक तथा यात्रुहरू सधैँ ज्यानको जोखिम मोलेर यात्रा गर्न बाध्य छन्।

चालक तथा यात्रुलाई सतर्कता अपनाउन आग्रह

सडक डिभिजन कार्यालय र स्थानीय प्रशासनले सडक खुला भए तापनि उक्त खण्ड पार गर्दा विशेष सावधानी अपनाउन अनुरोध गरेको छ। वर्षाको समय सुरु भइसकेकाले यात्रा गर्नुअघि सडकको अवस्था बुझेर र सजग भई गाडी चलाउन चालकहरूलाई आग्रह गरिएको छ।