परराष्ट्रमन्त्री खनालको अस्ट्रेलिया भ्रमण सम्पन्न: नेपालको बाढी राहतका लागि थप १५ मिलियन डलर सहायता घोषणा

काठमाडौँ, असोज २४ गते । परराष्ट्रमन्त्री शिशिर खनाल फिजी र टुभालुमा आयोजित जलवायु परिवर्तनसम्बन्धी उच्चस्तरीय ‘प्रि–कोप लिडर्स इभेन्ट’ मा सहभागिता जनाएर तथा अस्ट्रेलियाको औपचारिक भ्रमण पूरा गरी आज स्वदेश फर्कनुभएको छ।

भ्रमणका क्रममा अस्ट्रेलियाली सरकारले नेपालमा हालै गएको विनाशकारी बाढीबाट प्रभावित क्षेत्रको राहत, पुनर्लाभ तथा पुनर्निर्माणका लागि थप १५ मिलियन अस्ट्रेलियन डलर सहायता घोषणा गरेको छ।

फिजीको नाडीमा आयोजित सम्मेलनलाई सम्बोधन गर्दै मन्त्री खनालले नेपालको भोटेकोशी जलाधार क्षेत्रको बाढीलाई ‘हिमाली सुनामी’ को संज्ञा दिनुभयो। उहाँले हिमाल पग्लिने र समुद्री सतह बढ्ने समस्या एउटै सङ्कट रहेको बताउँदै कोप–३१ का लागि नेपालका चार प्रमुख प्राथमिकता तथा ‘सगरमाथादेखि समुद्रसम्म’ को साझेदारीमा जोड दिनुभयो।

अस्ट्रेलियाका विदेशमन्त्री पेन्नी वोङसँगको द्विपक्षीय वार्तापछि थप सहायता रकमको घोषणा भएसँगै बाढी विपद् प्रतिकार्यका लागि अस्ट्रेलियाको कुल सहायता २६ मिलियन अस्ट्रेलियन डलर पुगेको छ। यसका साथै न्यु साउथ वेल्सका प्रिमियर र गभर्नर–जनरलसँगको भेटमा विपद् व्यवस्थापन, सिधा हवाई सम्पर्क, शैक्षिक सहकार्य तथा द्विपक्षीय सम्बन्ध विस्तारका विषयमा छलफल भएको छ।

भ्रमणका दौरान मन्त्री खनालले अस्ट्रेलियामा बसोबास गर्ने दुई लाखभन्दा बढी प्रवासी नेपालीहरूसँग अन्तरक्रिया गर्दै बाढीपछिको पुनर्निर्माणमा उनीहरूको सीप, ज्ञान र प्रविधि उपयोग गर्न आह्वान गर्नुभएको छ।

साथै, क्यानबेरास्थित नेपाली राजदूतावासलाई आर्थिक कूटनीतिलाई प्राथमिकतामा राखेर सेवा प्रवाह छरितो बनाउन निर्देशन दिनुभएको छ।

प्रमुख उपलब्धि तथा विवरण