पुनर्निर्माण सहायता र एफएटिएफको ‘ग्रे’ सूचीबारे छलफल गर्न अर्थमन्त्री डा. स्वर्णिम वाग्ले अमेरिकामा

काठमाडौँ, असोज १९ गते । भोटेकोशी बाढीपछिको पुनर्निर्माणका लागि आवश्यक सहायता परिचालन तथा द्विपक्षीय सहयोग जुटाउन अर्थमन्त्री डा. स्वर्णिम वाग्ले संयुक्त राज्य अमेरिका पुग्नुभएको छ।

भ्रमणका क्रममा अर्थमन्त्री वाग्लेले सोमबार वासिङ्टन डिसीमा अमेरिकी अर्थमन्त्री (सेक्रेटरी अफ दी ट्रेजरी) स्कट बेसेन्ट र विश्व बैंक समूहका अध्यक्ष अजय बङ्गासँग उच्चस्तरीय भेटवार्ता गर्ने कार्यक्रम रहेको अर्थ मन्त्रालयले जनाएको छ।

छलफलका क्रममा हालै भोटेकोशी क्षेत्रमा आएको भीषण बाढीबाट क्षति पुगेका भौतिक तथा आर्थिक पूर्वाधारको पुनर्निर्माण र उत्थानशील विकासका लागि थप वित्तीय सहायता जुटाउने विषयलाई प्राथमिकताका साथ उठाइनेछ। साथै नेपालको आर्थिक साझेदारी सुदृढ बनाउन द्विपक्षीय तथा बहुपक्षीय सहयोग अभिवृद्धिका विषयमा समेत विचार-विमर्श हुनेछ।

यसैगरी, वित्तीय कारबाही कार्यदल (FATF) को ‘ग्रे’ सूचीबाट नेपाललाई बाहिर निकाल्ने र बृहत् आर्थिक सुधारका प्रयासबारे विश्व बैंक तथा अमेरिकी अधिकारीहरूसँग विस्तृत छलफल हुनेछ। सहकारी क्षेत्रको कमजोर नियमन र कानुनी तथा संरचनागत कमजोरीका कारण नेपाल ‘ग्रे’ सूचीमा परेको र कालो सूचीको जोखिम घटाउन अर्थ मन्त्रालयले प्राथमिकताका साथ पाँचवटा सुधारका प्याकेज घोषणा गरिसकेको छ।

आफ्नो अमेरिका भ्रमणका क्रममा अर्थमन्त्री वाग्लेले सडक, विद्युत् प्रसारण लाइन जस्ता पूर्वाधार निर्माणमार्फत रोजगारी र आर्थिक अवसर सिर्जना गर्न विकास साझेदार एवम् निजी क्षेत्रको लगानी अभिवृद्धि गर्ने प्रयास गर्नुहुनेछ। यसका लागि अमेरिकी सरकारअन्तर्गतको ‘इन्टरनेसनल डेभलपमेन्ट फाइनान्स कर्पोरेसन’ (DFC) का उच्च अधिकारीहरू तथा निजी क्षेत्रका अग्रणी लगानीकर्ताहरूसँग पनि छुट्टाछुट्टै भेटवार्ता गर्ने कार्यक्रम तय भएको छ।

भ्रमण तथा भेटवार्ताका प्रमुख विषयहरू