भोटेकोशी बाढी: अलपत्र परेका २६१ विदेशी पर्यटकको उद्धार, ३२० अझै सम्पर्कविहीन

काठमाडौँ, भदौ १४ गते । नेपाल–चीन सीमा क्षेत्र रसुवाको भोटेकोशीमा आएको विनाशकारी बाढीमा परेर सम्पर्कविहीन भएका पर्यटकमध्ये शनिबार साँझसम्म १६ देशका २६१ जना विदेशी पर्यटकको सफल उद्धार गरिएको छ।

नेपाल पर्यटन बोर्डका अनुसार गोसाइँकुण्ड र कैलाश मानसरोवर यात्राका क्रममा अलपत्र परेका पर्यटकमध्ये भारतका १६७, चीनका ४०, युक्रेनका आठ लगायत विभिन्न देशका नागरिकहरूको उद्धार गरी सुरक्षित स्थानमा ल्याइएको छ।

संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड, पर्यटक प्रहरी र स्थानीय सरोकारवाला निकायहरू प्रभावित क्षेत्रमा उद्धार तथा खोजी कार्यलाई तीव्र रूपमा अगाडि बढाइरहेका छन्। यद्यपि, बाढीमा परेर अझै ३२० जना पर्यटकहरू सम्पर्कविहीन रहेकाले उनीहरूको खोजी कार्य र घाइतेहरूको उपचारलाई प्राथमिकताका साथ जारी राखिएको छ।

पर्यटकको सुरक्षालाई पहिलो प्राथमिकता दिँदै पर्यटन बोर्डले सबैलाई धैर्य र सतर्क रहन आह्वान गरेको छ। साथै, कुनै पनि जानकारी वा सहयोगका लागि बोर्डले टोल फ्री नम्बर १२३४, हटलाइन नम्बर ११४४ र पर्यटन प्रहरीको नम्बर ९८५१२८९४४५ मा सम्पर्क गर्न आग्रह गरेको छ।