काठमाडौं । २०२६ फिफा विश्वकपको क्वार्टरफाइनल चरण सम्पन्न भएसँगै फ्रान्स, स्पेन, इङ्ल्यान्ड र अर्जेन्टिनाले अन्तिम चार अर्थात् सेमिफाइनलमा स्थान सुरक्षित गरेका छन्। चारै खेलमा रोमाञ्चक प्रतिस्पर्धा, अतिरिक्त समयको नाटकीय मोड, विवादित निर्णय र स्टार खेलाडीहरूको उत्कृष्ट प्रदर्शनले विश्व फुटबल समर्थकलाई भरपूर मनोरञ्जन दिएको छ।
फ्रान्सले मोरक्कोलाई २–० ले पराजित गर्दै लगातार तेस्रो पटक विश्वकपको सेमिफाइनल यात्रा तय गर्यो। स्पेनले बेल्जियमलाई अन्तिम समयमा हरायो भने इङ्ल्यान्ड र अर्जेन्टिनाले अतिरिक्त समयमा जित निकाल्दै अन्तिम चारमा स्थान बनाए।
क्वार्टरफाइनल नतिजा
फ्रान्स २–० मोरक्को
गोलकर्ता: किलियन एम्बाप्पे (६०’), उस्मान डेम्बेले (६६’)
स्पेन २–१ बेल्जियम
गोलकर्ता: फाबियान रुइज (३०’), मिकेल मेरिनो (८८’) | चार्ल्स डे केटेलारे (४१’)
नर्वे १–२ इङ्ल्यान्ड (अतिरिक्त समय)
गोलकर्ता: आन्द्रेयास स्केल्डेरुप (३६’) | जुड बेलिङ्घ्याम (४५+२’, ९३’)
अर्जेन्टिना ३–१ स्विट्जरल्यान्ड (अतिरिक्त समय)
गोलकर्ता: एलेक्सिस म्याक एलिस्टर (१०’), जुलियन अल्भारेज (११२’), लाउटारो मार्टिनेज (१२०+१’) | डान एनडोये (६७’)
एम्बाप्पे र डेम्बेलेको गोलमा फ्रान्स अन्तिम चारमा
म्यासाचुसेट्सस्थित गिलेट स्टेडियममा फ्रान्सले मोरक्कोलाई २–० ले हराउँदै लगातार तेस्रो विश्वकप सेमिफाइनल यात्रा सुनिश्चित गर्यो।
पहिलो हाफमै फ्रान्सले पेनाल्टीको अवसर पाए पनि किलियन एम्बाप्पेको प्रहार मोरक्कोका गोलरक्षक यासिन बोनोले उत्कृष्ट रूपमा बचाएका थिए। तर दोस्रो हाफमा एम्बाप्पेले आफ्नो गल्ती सच्याउँदै ६०औँ मिनेटमा शानदार गोल गरे। त्यसको केवल छ मिनेटपछि एम्बाप्पेको पासलाई उस्मान डेम्बेलेले गोलमा परिणत गर्दै फ्रान्सको जित पक्का गरे।
यस जितसँगै एम्बाप्पेले प्रतियोगितामा आफ्नो गोल संख्या आठ पुर्याउँदै गोल्डेन बुटको दौडमा अग्रता कायम राखेका छन्। प्रशिक्षक दिदिएर डेसाँको टोली अब सेमिफाइनलमा स्पेनसँग भिड्नेछ।
अन्तिम समयमा मेरिनोको गोल, स्पेनको शानदार पुनरागमन
क्यालिफोर्नियाको सोफाई स्टेडियममा स्पेनले बेल्जियमलाई २–१ ले पराजित गर्दै सेमिफाइनलमा स्थान बनायो।
फाबियान रुइजले ३०औँ मिनेटमा स्पेनलाई अग्रता दिलाएका थिए। तर चार्ल्स डे केटेलारेले पहिलो हाफमै बराबरी गोल फर्काए। खेल अतिरिक्त समयतर्फ जाने संकेत देखिँदै गर्दा ८८औँ मिनेटमा मिकेल मेरिनोले निर्णायक गोल गर्दै स्पेनलाई अन्तिम चारमा पुर्याए।
बेलिङ्घ्यामको दुई गोलले इङ्ल्यान्डलाई ऐतिहासिक जित
फ्लोरिडाको हार्ड रक स्टेडियममा भएको रोमाञ्चक खेलमा इङ्ल्यान्डले अतिरिक्त समयमा नर्वेलाई २–१ ले हरायो। आन्द्रेयास स्केल्डेरुपले ३६औँ मिनेटमा नर्वेलाई अग्रता दिलाएका थिए।
पहिलो हाफको इन्जुरी समयमा जुड बेलिङ्घ्यामले बराबरी गोल गरे। उक्त गोलअघि बल माथिको क्यामेरा तारमा लागेको विषयले ठूलो विवाद सिर्जना गर्यो। यद्यपि फिफाले बलभित्र रहेको सेन्सरबाट प्राप्त तथ्याङ्कका आधारमा बलले तार नछोएको स्पष्ट पारेको थियो।
अतिरिक्त समयको ९३औँ मिनेटमा बेलिङ्घ्यामले व्यक्तिगत दोस्रो तथा टोलीका लागि विजयी गोल गर्दै इङ्ल्यान्डलाई सेमिफाइनल पुर्याए।
खेलपछि बेलिङ्घ्यामले आफ्नी आमा डेनिसको सल्लाहले आफूलाई पहेँलो कार्डबाट जोगिन मद्दत गरेको बताए। “आमाले पूरै हप्ता मेरो भाषा, ट्याकल र भावनामा नियन्त्रण राख्न भन्नुभएको थियो। त्यसैले म सावधानीपूर्वक खेलेँ,” उनले भने।
इङ्ल्यान्डका कप्तान ह्यारी केनले पनि बेलिङ्घ्यामको प्रशंसा गर्दै भने, “हामीले उत्कृष्ट प्रदर्शन नगरे पनि जित्ने बाटो भेट्टायौं। जुडले सही समयमा दुई गोल गरेर टोलीलाई सेमिफाइनल पुर्याए।”
यता नर्वेका प्रशिक्षक स्टाले सोल्बाकेनले बराबरी गोलअघि बलको दिशा परिवर्तन भएको दाबी गर्दै उक्त घटनालाई आफ्नो टोलीका लागि दुर्भाग्यपूर्ण क्षण बताएका छन्।
अल्भारेजको पहिलो विश्वकप गोलले अर्जेन्टिनालाई अन्तिम चारमा
क्यान्सास सिटीस्थित जीईएचए फिल्डमा अर्जेन्टिनाले अतिरिक्त समयमा स्विट्जरल्यान्डलाई ३–१ ले हराउँदै सेमिफाइनलमा स्थान बनायो।
एलेक्सिस म्याक एलिस्टरले १०औँ मिनेटमा अर्जेन्टिनालाई अग्रता दिलाए पनि डान एनडोयेले ६७औँ मिनेटमा बराबरी गोल फर्काए। त्यसपछि खेल अतिरिक्त समयमा पुग्यो।
१११औँ मिनेटसम्म बराबरी रहेको खेलमा जुलियन अल्भारेजले ११२औँ मिनेटमा विश्वकपको आफ्नो पहिलो गोल गर्दै अर्जेन्टिनालाई अग्रता दिलाए। इन्जुरी समयको पहिलो मिनेटमा लाउटारो मार्टिनेजले अर्को गोल थप्दै जित सुनिश्चित गरे।
खेलमा अर्को नाटकीय मोड पनि देखियो। भिडियो सहायक रेफ्री (VAR) को समीक्षा पछि अर्जेन्टिनाका लियान्ड्रो पारेडेसमाथिको पहेँलो कार्ड फिर्ता लिइयो भने स्विट्जरल्यान्डका ब्रील एम्बोलोलाई दोस्रो पहेँलो कार्डसहित मैदानबाट बाहिर पठाइयो। त्यसपछि स्विट्जरल्यान्ड १० खेलाडीमा सीमित भएको थियो।
यद्यपि लियोनेल मेस्सीले गोल गर्न सकेनन्, उनले एक असिस्ट गर्दै टोलीको जितमा महत्वपूर्ण योगदान दिए। यससँगै अर्जेन्टिनाले विश्वकप इतिहासमा सर्वाधिक १३ पटक अतिरिक्त समय खेलेको नयाँ कीर्तिमान पनि बनायो।
म्यान अफ द म्याच घोषित अल्भारेजले भने, “यो मेरो लागि ठूलो भावनात्मक क्षण हो। अन्ततः गोल गर्न पाउँदा निकै खुसी छु। हामी अन्त्यसम्म विश्वासका साथ खेल्यौं र त्यसको फल पायौं।”
उनले सेमिफाइनलबारे थप्दै भने, “हामी विश्वका उत्कृष्ट चार टोलीमा पर्न सफल भएका छौं। अब इङ्ल्यान्डविरुद्धको चुनौतीका लागि राम्रो तयारी गर्नेछौं।”
सेमिफाइनल तालिका
१५ जुलाई २०२६
फ्रान्स बिरुद्ध स्पेन
समय: नेपाली समय अनुसार बिहान १२:४५ बजे
स्थान: एटी एन्ड टी स्टेडियम, आर्लिङ्टन, टेक्सास
१६ जुलाई २०२६
इङ्ल्यान्ड बिरुद्ध अर्जेन्टिना
समय: नेपाली समय अनुसार बिहान १२:४५ बजे
स्थान: मर्सिडिज–बेन्ज स्टेडियम, एटलान्टा, जर्जिया
विश्व फुटबलका चार शक्तिशाली टोली अब फाइनल प्रवेशका लागि प्रतिस्पर्धा गर्दैछन्। एकातिर किलियन एम्बाप्पेको फ्रान्स र युरोपियन च्याम्पियन स्पेनबीच रोचक भिडन्त हुनेछ भने अर्कोतर्फ जुड बेलिङ्घ्यामको इङ्ल्यान्ड र लियोनेल मेस्सीको अर्जेन्टिनाबीच बहुप्रतीक्षित सेमिफाइनल हुनेछ। विश्वकप २०२६ अब उपाधि यात्राको सबैभन्दा रोमाञ्चक मोडमा पुगेको छ।
What if you could work from Anywhere?
Explore More with something that can change your Life!
